Botuar në Mapo Online, më 2 Tetor 2014

Prokuroria e Sarandës urdhëroi arrestimin e Besnik Abedinit dhe shefit të Urbanistikës së Ksamilit, për dhënie të lejeve të ndërtimit në kundërshtim me ligjin. Pezullohet nga detyra edhe kryeinspektori i INUV

Kryetari socialist i komunës së Ksamilit u arrestua dje, pasi akuzohet se ka firmosur 15 leje ndërtimi në kundërshtim me ligjin. Besnik Abedini u prangos së bashku me shefin e Urbanistikës në komunë, Fatos Malajn, pas një hetimi të nisur një muaj më parë nga Prokuroria e Sarandës. Prokuroria e Sarandës tha dje se urdhër-arrestet për kryetarin e komunës dhe vartësin e tij janë miratuar edhe nga gjykata e rrethit. Ekzekutimi i tyre është bërë në orët e pasdites. Së bashku me Besnik Abedinin dhe Fatos Malajn, prokuroria ka hetuar edhe shefin e Inspektoratit Vendor, Alban Budo, për të cilin gjykata ka vendosur dje pezullimin nga detyra. Akuza që rëndon mbi kryekomunarin Abedini dhe shefin e Urbanistikës së komunës së Ksamilit është ajo e shpërdorimit të detyrës, lidhur me 15 leje ndërtimi të dhëna në mënyrë të paligjshme. Sipas Prokurorisë, hetimet kanë nisur fillimisht mbi një hotel 5-katësh, të ndërtuar në zonën turistike me leje të komunës së Ksamilit, edhe pse ishte në kundërshtim me studimin urbanistik. Prokuroria ka marrë në pyetje personin që ka kryer ndërtimin e hotelit, i cili rezultoi me biznes që prej vitit 2005. “Për këtë ndërtim, ky shtetas ka shpjeguar se është pajisur me leje zhvillimi dhe ndërtimi më 7 dhjetor 2013, të miratuar nga Komuna Ksamil”, – thotë prokuroria. Më tej, ai ka pohuar se procesi i ndërtimit është verifikuar gjatë fazave të tij nga Inspektorati Vendor dhe punonjësit e zyrës së Urbanistikës. Prokuroria pretendon se leja e ndërtimit është dhënë për tri kate mbi tokë dhe një nën tokë, çka është në kundërshtim me gjendjen e objektit me 5 kate. Por investitori kishte aplikuar për legalizimin e katit shtesë në vitin 2013 pranë zyrës së ALUIZNI-t në Sarandë. Organi i akuzës shpjegon më tej se kryetari i komunës ka shkelur detyrën në këtë rast, pasi leja e ndërtimit nuk është dhënë në përputhje me planin urbanistik e më pas ka shkelur edhe kriteret, duke mos u diktuar nga inspektoratet në varësi të kryekomunarit. Por ndërtimi i këtij hoteli nuk është rasti i vetëm i abuzimit me lejet e ndërtimit, për të cilat u arrestua Besnik Abedini. Prokuroria thekson se 14 objekte të tjera janë lejuar të ndërtohen në kundërshtim me kërkesat ligjore të ligjit për “Planifikimin e Territorit”. Bëhet fjalë për bar-kafe, depo hoteli, shtesa kati e garazhe, por edhe për kampingje që në këtë zonë turistike janë mjaft të frekuentuara në periudhën e verës. “Duke analizuar këtë rast, rezulton se INUV-I i Komunës Ksamil nuk ka ushtruar kompetencat ligjore të përcaktuara qartazi në ligj, duke konsumuar veprën penale të “shpërdorimit të detyrës”, parashikuar nga neni 248 i Kodit Penal. Në lidhje me veprën penale të kryer, mbështetur mbi provat e analizuara më sipër, jemi të mendimit që të kërkojmë pranë gjykatës: caktimin e masave të sigurimit personal “arrest me burg” parashikuar nga neni 238 i K.Pr.penale për shtetasit Besnik Abedini  dhe Fatos Malaj”, – thotë Prokuroria e Sarandës. Sa i takon kryeinspektorit Budo, vetë prokuroria ka kërkuar në gjykatë masën e “pezullimit nga detyra” përgjatë kohës së hetimeve.

Lejet e paligjshme të ndërtimit

Hotel në zonën e Ksamilit, në kundërshtim me planin urbanistik

Praktika për dhënien e lejes së ndërtimit për bar-kafe të shtetasit DH.C.

Praktika për dhënien e lejes së ndërtimit Depo në funksion të hotelit të shtetasit Z.J.

Praktika për dhënien e lejes së ndërtimit (mirëmbajtje), objekt i brendshëm të shtetasit N.TH.

Praktika për dhënien e lejes së ndërtimit (shtesë kati), të shtetasit R.A.

Praktika për dhënien e lejes së ndërtim garazhi në emër të shtetases N.S.

Praktika për dhënien e lejes së ndërtimit godinë me konstrukte të lehtësuara një kat në emër të shtetases D.P.

Praktika për dhënien e lejes së ndërtim Bar restorant me investitor XH.SH.

Praktika për dhënien e lejes së ndërtimit shtesë kati në objekt ekzistues me investitor K.B

Praktika për dhënien e lejes së ndërtim piceri me konstrukte të lehtësuar me investitor A.O

Praktika për dhënien e lejes së ndërtimit mirëmbajtje (rikonstruksion) me investitor Firmën “B….”.

Praktika për dhënien e lejes së ndërtimit Kamping veror me investitor D.M.

Praktika për dhënien e lejes së ndërtimit bar restorant veror të përkohshëm  me investitor A.XH.

Praktika për dhënien e lejes së ndërtim mirëmbajtje (rikonstruksion) çatie me investitor V.M