Nga Loro Stajka, SHBA

Duke i njohur gazetat përmes internetit kam preferuar gazetën tuaj. Ju që jetoni në Shqipëri e dini dhe e ndjeni me mirë se unë se Ligji 7501 për atë pjesë që pronarëve i mohon pronën e të parëve, është rruga e tradhtisë kombëtare. Vjedhja e pronës së tjetrit ka qenë dhe do të mbetet imorale, si me kanun e zakon, edhe me ligjet e çdo kohe. Presidenti aktual dhe ata që kanë qenë më parë në krye të shtetit, duhet të kishin protestuar të parët për këtë shkelje flagrante të Kushtetutës, deri në dhënie të dorëheqjes, por ata kanë heshtur.  Unë jam në pension dhe kam kohë të bollshme ta lexoj në internet shtypin e ditës. Më revolton qëndrimi tinëzar i ambasadorit të BE-së, OSBE-së dhe ambasadorit Arvizu për pronat, mentaliteti i Kryeministrit Edi Rama që ka deklaruar se do japin pronat sipas ligjit 7501 dhe indiferentizmi i shoqërisë civile, përfshi median. Këtë rrugë antishqiptare, që nisi pas vitit 1991 Ramizi, e mbrojti dhe e përkeqësoi Berisha dhe Nano dhe po e përfundon Edi Rama, megjithëse sot ka 84 vota që i mjaftojnë për të korrigjuar gabimet e pararendësve. Askush nuk mund të justifikohet me mbrojtjen e situatës së krijuar që tokat e shqiptarit ia fal grekut, se shqiptarët i ka futur në hasmëri me njëri-tjetrin dhe ka zhvilluar  korrupsion në drejtësi dhe administratë. Praktikisht, kjo është dëm për të gjithë shqiptarët që jetojnë në Shqipëri dhe është dhimbje për ne që jetojmë në SHBA dhe vende të tjera. Zbatimi i Nenit 181 të Kushtetutës për pronat do tregojë se cili është Edi Rama dhe cilat janë mediat kombëtare. Mendoj se mediat që i shërbejnë Shqipërisë duhet të ngrenë zërin dhe të sensibilizojnë, pse kryetari i Qeverisë angazhohet të japë tapitë me Ligjin 7501 dhe nuk zbaton Nenin 181 të Kushtetutës që korrigjon gabimet. Unë nuk kam asnjë interes prone, pasi e kam zgjidhur problemin me pronat që kisha në Shqipëri, por dëshiroj të shkruaj për pronën, pasi ndjej detyrim moral për të ngritur zërin kundra të pa drejtës që po i bëhet popullit.